संध्याराग

14 May 2012 at 14:38

अवतरला अवचित तिजवर

हा सांजरंग ओला

अन मेघही खुळ्यागत

जणू बावरुन गेला

ती आज दंग होती

पण रंग हा नवासा

रंगात गंधवेडा

प्राजक्त चिंब न्हाला

लेवूनी गंधित माला

ती होई सावळी राधा

तिचिया श्वासातून गहिरा

अंधार मावळून गेला

चमचमते चांदणेही

अदबीने दारी चमके

हे तोरण चमचमणारे

चंद्रही घेऊनी आला

ती अलगद छेडीत जाई

हा गंधित संध्याराग

अन सूर ओळखीचा

तिजला स्मरुन गेला

ती हाक ऐकू येई

कंपित सूर्यमाला

त्या कंपनात हळवा

स्वर तो विरुन गेला